كثرت همومى والمشاكل عديدة
وقلبى من الغثا فيه خراف
وقمت افتح مع الاشعار صفحة جديدة
واجر القوافى من تواريخ الاسلاف
والحر عند الجد يظهر رصيده
والقاف يحكى من تجاريب ما شاف / الشاعر/ موسى الدلح
حالى صعيب وزادة الذل تصعيب
ياحالة القهر والبين يا شوم حالي
كل الشواهى تتعلق من العراقيب
واحنا انتعلق فى خلق ثوب بالى
وطابت اجروح الناس وعيت اجروحنا اتطيب
جرح الكرااامة ماله دوى واندمااالى
غول ابوالهول لما نمن له مخاليب
اعلن علينا الحرب ظلم وضلالى
وقام بجرايم حرب فى حق البوادى وتعذيب
وحاصر عربنا فى خلا وهود خااالى
وكثرن اكلابه وياكم طوحن ذيب
وعاثن الديرة جنوبها والشمالى
خلو وطنا فى دمار وتخاريب
وتحكموا فينا اولاد الخدم والموالى
وحطوا الهفايا فوق منا مناويب
واهل المراجل بين الخلا واعتقالى
يودوا اللى يودى اعلوم ويجيب
وياخذ ع راسه وينظرب بالنعالى
ويقول ما يقولوه من دون تعقيب
نذل عند انذااال وياويلنا من النذالى
اللى شاغلهم غير كوى الجلاليب
وبيع الضماير بالذهب والريالى
لحاسة الاختام دون شكا ولاريب
ما ننتظر منهم غير هاذى الافعالى
وانقول ونعيد ونسب ونعيب
والقول فى المقيول ماله مقالى
الشاهد الله فعلهم فعل ترهيب
وقهر النشاما اهل الشرف والعقالى
قالوا علينا ارهاب وحطوا علينا العذاريب
جرت حوادث مدبرة بفتعالى
اتهمونا وحالا خلونا مطاليب
الكل مطلوب للمرمطة والسؤالى
وافعال منهم منهن الراضع ايشيب
وكرامة العربااان اتلطخت بالوحاالى
ياكم انهتك عرض مع شقة الجيب
يوم الصبايا تربطن بالحبااالى
وداسوا شرفهن بين قبو , وسراديب
وشبت عليهن اجحوش الغجر والبغالى
وكل المناشد ولا الجيرات ما تجيب
حق العذارى وعذابهن والهوالى
العيب عيب وفعلة العيب بتعيب
واكبر خطا تقسيمكم للرجالى
سينا ثلاث اقسام صارت بترتيب
ثلث الخوين وثلث مسجون وثلثا تجنا فى الخلا والجبالى
لعبة سياسة واهل السياسة ملاعيب
نسيوا عملنا فى حروبهم والقتالى
اسالوا التاريخ عن جغرافيا الهج تغريب
جيهة غروب الشمس ( يوم هكعت للزوالى )
يوم الدخن فى الجو طالع زعاريب
ويوم المدافع ارعدن فى العوالى
وجتكوا المنايا من فوق روس المراقيب
يوم الحرايب ولعن بشتعاالى
وركظتم من الذعر كالارانب مراعيب
كلا ع وجهه كما انياقا همااالى
وما وسعكم بر كنتم جثايا ومصاويب
يوم الهزيمة وهجاجكم بعتجاااالى
من ام شيحان وراس النقب والشرم وام المخاشيب
ونخل وصدرحيطان واجبال اليلق والحلالى
وشلناكم على اكتوفنا وعنكم دفعنا المشاريب
بالصبر ع العدوان يوم الوطن فى احتلالى
شمسنا عيت على الناس لاتغيب
وقمرنا فى ظلام الليل دوما يلالى
وعيينا عن التدويل يوما لفتنا المناديب
فى مؤتمر مشهور وقلنا عليكم غوالى
وجزاتنا منكم غير نشر الاكاذيب
والسجن والتعذيب وذبح العجز والعيالى
والله يعين اللى عيونه معاصيب
واللى تعبوا وانرموا بالشوالى
واللى تدلوا من المشانق مصاليب
واللى غدو تحت الثرى والرمااالى
ويالله ياعالم الحال وعامل الطيب بالطيب
انت القدير وعالم بكل حاااااالى
تفرج علينا وتخلى جروحنا تطيب
بجاه الرسول وحق الصلاة وابتهااااالى
ونلاقى اهلنا من بعد غيبة وتغريب
وننسى عذاااب الوقت وظلم البشر والليالى
ليست هناك تعليقات:
إرسال تعليق